Умард Атлантын гэрээний байгууллага буюу НАТО болон Европын Холбооны гишүүн улсууд Оросын дипломатчдыг нутаг буцаах шийдвэр гаргасантай холбоотойгоор Орос улс хариу арга хэмжээ авна хэмээн ОХУ-ын ГХЯ мэдээлжээ.
 
Их Британийн Солсбери хотод Оросын Тагнуулын ерөнхий газрын хурандаа асан Сергей Скрипалийг мэдрэл саажуулах химийн бодисоор хордуулсан хэрэгтэй холбоотойгоор Оросын 60 дипломатчийг нутаг буцааж, Сиэтл хот дахь Оросын Консулын газрыг хаахыг АНУ-ын Ерөнхийлөгч Дональд Трамп холбогдох албаны хүмүүст үүрэг болгосон юм. Мөн Европын Холбооны хэд хэдэн гишүүн улсууд Оросын дипломатчдыг нутаг буцаах бодолтой байгаагаа мэдэгдсэн билээ.

“Солсбери хотод энэ сарын 4-нд болсон хэргийн буруутанг олох, учир шалтгааныг нь тогтоох зорилгогүй байсны хувьд ийм алхам авч хэрэгжүүлж байна гэж үзэж байна. Эдгээр улсын авч хэрэгжүүлж буй тааламжгүй алхмуудыг бид зүгээр өнгөрөөхгүй бөгөөд хариу арга хэмжээ авах болно” хэмээн тус яамны мэдэгдэлд дурджээ.

Энэ сард Их Британи улс Оросын 23 дипломатчийг нутаг буцаахыг үүрэг болгосон билээ. Үүний хариуд Орос ч мөн Их Британийн дипломатуудыг нутаг буцаах шийдвэр гаргасан юм.