“BlueMon” төвийн Norphei Art галерей наймдугаар сарын 22-ны өдөр “Анир” үзэсгэлэнгийн нээлт боллоо.

Наймдугаар сарын 31-ний өдрийг хүртэл үргэлжлэх энэхүү үзэсгэлэнд уран бүтээлч, зураач МУЭХорооны гишүүн Н.Гүнчинсүрэн, Л.Давааням нарын хамтарсан уран бүтээлүүдээ үзэгч олноо дэлгэн үзүүлж байна.

“Анир” уран бүтээл нь реалистакадемик дэг сургалтын уран зургийн  гайхамшигт ур чадварыг харуулж байгаагаараа онцлогтой аж.

Хэдийгээр тус бүтээлүүд нь Монгол орны үзэсгэлэнт байгаль, нүүдэлчин ард түмний өдөр тутмын аж байдал, сонин содон үзэгдлийг илэрхийлж байгаа боловч тус хоёр уран бүтээлчийн байгалиас заяасан урлагийн өндөр мэдрэмж, дахин давтагдашгүй өнгийн тоглолт, зохиомж нь эдгээр бүтээлүүдийг сэтгэл догдлом харагдуулж байгаа юм. Монголын орчин үеийн урлагийн тавцан дээр реалист уран зургийн чиглэлээр туурвиж буй аж байдал, байгаль зураг ховордож байгаа энэ үед эдгээр залуу уран бүтээлчдийн туурвил нь Монголын урлагт нэн удахгүй өөрчлөлтүүдийг авчирна гэдэгт бид итгэлтэй байна гэж мэргэжлийн хүмүүс дүгнэж байна.

Уран бүтээлч Л.Давааням нь ОД ДУДТДС /Дүрслэх Урлаг Дизайн Технологийн Дээд Сургууль/-г 2008онд зураач мэргэжлээр төгсчээ. Түүнээс хойш тасралтгүй уран бүтээлээ туурвихын зэрэгцээ ИЗОУИС /Их Засаг Олон Улсын Их Сургууль/-н ДУДТДС /Дүрслэх Урлаг Дизайн Технологийн Дээд Сургууль/-д багшилж байна.

Харин уран бүтээлч Н.Гүнчинсүрэн нь 2006-2007 онд ДУДэС, 2007-2011 онд ОХУ Красноярск хотын КГХИ /Красноярский Государственный Художественный Институт/ А.А.Покровский уран зургийн урланд 2015-2017онд ОХУ СПГАИЖС им. Репина /САНКТ-ПЕТЕРБУРГСКИЙ ГОСУДАРСТВЕНЫЙ АКАДЕМИЧЕСКИЙ ИНСТИТУТ ЖИВОПИСИ, СКУЛЬПТУРЫ имени И.Е.РЕПИНА/ В.С.Песиковын урланд мэргэжил дээшлүүлж суралцжээ. Тэрээр уран бүтээлээ тасралтгүй туурвисаар байна.

Үзэсгэлэнгийн нээлтийн явцад төгөлдөр хуурч залуу олон сайхан аялгуу тоглосон юм.

Энэ үеэр хоёр уран бүтээлчтэй уулзаж, цөөн хором ярилцлаа.

Л.Давааням: Охиныг цээнийн ягаан өнгөөр төсөөлөн бодоод цэцэг зурдаг

- “Анир” нэртэй сайхан үзэсгэлэнгээ нээсэнд баяр хүргэе. Энэ үзэсгэлэнд байгаль ертөнцийн гоо сайхныг илэрхийлсэн зургууд байна. Жишээ нь, цээлийн ягаан цэцэг, шивэрч буй бороо гэх мэт. Тиймээс та “Анир” үзэсгэлэнгээ гаргах болсон тухайгаах эхлээд сонирхуулна уу?

-“Анир” үзэсгэлэнгийн нэр их учиртай. Би дөрвөн мөрт шүлэг зохиож байсан юм. Тэр шүлэгнээс минь “Анир” нэр үүдэлтэй. Нэг удаа найз Гүнчинсүрэндээ шүлгэндээ зориулаад хоёулаа сайхан байгалиар дагнасан үзэсгэлэнгээ хамтарч гаргая гэж санал тавьсан. Бид хоёр Н.К.Рерихийн академийн зураач залуучуудтай Н.К.Рерихийн замаар Дундговь, Өмнөговь, 13-р зуун, Цонжинболдог зэрэг газар руу судалбар судалгаанд явж, нэлээд хэдэн бүтээл хийж ирсэн. Энэ бүтээлээ бид хоёр баяжуулж, тус бүртээ 15 шинэ зураг нэмж зураад үзэсгэлэнгээ нээсэндээ баяртай байна.

-Ямар үг хэллэгтэй мөрт шүлэг юм бэ?

-Задгай анир өвсний шилбээрээ урсахад

Замын уртыг эгшиглэж зурна. гэсэн мөртөөр эхэлдэг шүлэг.

-“Анир” гэдэг нэрээр гол нь юуг илэрхийлэхийг хүссэн юм бэ?

-Анир нэрээр зөөлөн, чимээгүй, их тайван, гоё агшин мөчийг илэрхийлсэн. Аадар бороо зураагүй. Зөөлөн шиврээ бороо бол гоё үзэгдэл учир зурлаа. Бороо орж байгаа агшинг зураачид тэр болгон зурдаггүй шүү дээ. Монголын сайхан байгаль, агшин, аниргүйн байдал, тийм нэг гоё торгон мэдрэмжийг бүтээлдээ дүрсэлсэн.

-Та цээлийн ягаан, мөн цагаан цэцэгс зуржээ. Эрэгтэй хүн цэцэг ховор зурдаг шүү дээ. Өөрөө цээлийн ягаан өнгөнд дуртай юм уу. Ер нь яргуйн болон цээлийн ягаан өнгийг яагаад сонгосон юм бэ?

-Би өмнө нь “Цэцгэн зүйрлэл”, “Хатан цэцэг” нэртэй цэцгийн бие даасан үзэсгэлэнгээ хоёр ч удаа гаргасан. Жил болгоны 3-р сарын 8-ны өдөр цэцгийн үзэсгэлэнгээ гаргадаг. Цэцэг гэдэг зүйл миний хувьд эрхэм нандин.

Цэцэг бол хүний амьдралын үхэл, амьдрал, баяр гуниг, хагацал, хайр, дурлал бүхий л зүйлд цэцэг дагалддаг. Цээний ягаан өнгө бол их гоё мэдрэмж. Би одоо нэг хүүтэй. Охинтой болохыг хүсдэг. Тиймээс цээний ягаан цэцэгсийг зурахдаа ханьдаа зориулсан. Манай эхнэр зураач. Гэхдээ эхнэр маань дан морь зурдаг.

-Ямар сайхан юм бэ. Охинтой болохыг хүсэж, охиноо цээлийн ягаан өнгөөр илэрхийлээд байгаа юмуу даа?

-Тиймээ. Охиныг цээнийн ягаан өнгөөр төсөөлөн бодоод цэцэг зурдаг. Цэцэг бол үнэхээр гоё. Цэцгийг бурхны нүд гэж хүмүүс ярьдаг. Цэцэг болгон өөрийн гэсэн утга уянга, агууламжтай. Цагаан цэцэг урт удаан наслахыг бэлгэддэг бол улаан цэцэг хайр дурлалыг илэрхийлдэг байх жишээтэй.

Ер нь миний бодлоор цээнийн ягаан өнгө бол “охин” л юм. Цээнийн ягаан өнгөтэй цэцгийг охинтой айл гэрт авч тавьдаг, эсвэл охинтой болохыг мөрөөддөг айл гэртээ тавьдаг байх гэж боддог. Би цэцгийн талаар гүн судлаад байдаггүй ч миний бодол энэ юм.

-Баярлалаа, уран бүтээлийн амжилт хүсье. Үзэсгэлэнтэй охинг илэрхийлсэн цээлийн цэцэгсээ бэлгэшээж, охинтой болоорой.

Н.Гүнчинсүрэн: Сэтгэл хөдлөлтэйгээр зурах, бичих, будаг нялах зэрэг үзэл бодлынхоо онцлогийг илэрхийллээ

Зураач Н.Гүнчинсүрэн бүтээлийнхээ талаар ийн ярилаа.

-Та хоёрын үзэсгэлэнг үзээд баяртай байна. Үзэсгэлэнгийн онцлог нь юу байна вэ?

-Энэ оройн мэндийг хүргэе. Л.Давааням бид хоёр хамтарч нийт 30 орчим бүтээлээ “Анир” үзэсгэлэндээ дэлгэж гаргалаа. Монгол орныхоо байгалийн гол онцлог сайхан дүр төрх, хувирлыг илэрхийлсэн бүтээлүүд үзэсгэлэнд тавигдсан. Миний хувьд реалист чиг хандлагаар зурсан.

-Таны зургийг харахад реалист бүтээлдээ авангард урсгал агуулсан юм шиг?

-Зураач бүр өөрийн гэсэн үзэл бодол, арга барил, илэрхийлэлтэй байдаг. Миний хувьд сэтгэл хөдлөлтэйгээр зурах, бичих, будаг нялах зэрэг үзэл бодлынхоо онцлогийг илэрхийллээ.

-Голдуу ямар сэдвээр зурдаг вэ?

-Би хөрөг зургийн зураач. Энэ удаа байгалийн чиглэлээр зурж, найзтайгаа хамтарч үзэсгэлэнгээ олон түмэнд зориулж байна.

Сурвалжилсан Б.Баярмаа