УИХ нь ажлаа хийх ямар ч боломжгүй, Засгийн газрын гурван сайд нь огцорчихсон, Нийслэл хот нь даргаггүй болчихсон МАНарсан өдрүүд үргэлжилсээр.

Сануулбал УИХ-ын гишүүд Монгол төрийн үйл ажиллагааг гацааж, ажил хаялт, бойкот зарлаад сар гаруй хугацаа өнгөрлөө. Энэ хооронд хэлэлцэгдэх ёстой хуулийн төслүүд, батлагдах хууль тогтоомжууд, томилогдох албан тушаалтнууд гээд олон ажлууд гацлаа.

Ийнхүү УИХ-ын дарга М.Энхболдыг огцрохыг шаардан, шаардлагаа биелтэл гишүүд нэгдсэн чуулган, Байнгын хороодын хуралдаанд оролцохгүйгээ мэдэгдэн бойкотоо үргэлжлүүлсээр байгаа юм. Өнөөдрийн байдлаар гэхэд УИХ найм дах удаагаа ирцээ бүрдүүлэлгүй цагыг баржээ.

Харин шинэ он гарснаар төрийн түгжээ мултрах болов уу гэсэн иргэдийн таамаглал байсаар байна. Гэсэн хэдий ч өмнөх долоо хоногуудын үлбэгэр байдлаа УИХ үргэлжлүүлэхээр шийдэв бололтой. Учир нь өчигдөрөөс эхлэн ажиллаж эхлэх УИХ-ын бүлэг, байнгийн хороод, дэд хорооны хурлууд ирц бас л бүрдсэнгүй. Өнөөдөр хуралдах байсан УИХ-ын ирц дахиад л бүрдсэнгүй хаагдчихлаа.

Түүнчлэн МАН-ын том дарга нарын зодооны уршигаар Нийслэл хот хүртэл удирдлаггүй өвөлжиж байна. Уг нь Нийслэлийн захирагч асан С.Батболдыг үүрэгт ажлаа өгснөөс хойш хуулийн хугацаанд НИТХ шинэ даргаа томилох ёстой байсан.

Гэвч Нийслэлийн МАН-ын дарга Д.Сумьяабазарын хүссэн хүн олонхийн дэмжлэг авч чадахгүй байгаагаас улбаалан хотын даргын суудал хоосон хэвээр байгаа юм. Шинэ оны өмнөхөн МАН-ын УЗ-ийн хурал одоогийн НИТХ-ын дарга С.Амарсайханг хотын даргад зүтгүүлсэн ч МАН-ын төлөөлөгчид эв, эеэ ололгүй хойшлуулсаар байна.

Ямартай ч эрх баригчид болох УИХ-ын дарга М.Энхболд, Ерөнхий сайд У.Хүрэлсүх нар толхилцооноо дуусгаж тохиролцоонд хүрэх хүртэл, эсвэл хоёулаа хоймроос буухаас нааш Монгол төр хүлээснээсээ салахгүй нь бололтой.

А.Төмөр

АРДЧИЛАЛ.МН