Олон улсын олимпын хорооны ОУОХ-ны Гүйцэтгэх зөвлөл хуралдаж, спорт холбоодоос ирсэн саналыг үндэслэн “Милан-Кортина 2026” өвлийн олимпын хөтөлбөрт 8 шинэ төрөл нэмэхээр болсныг МҮОХ-ноос мэдээллээ. Эмэгтэй тамирчдын оролцоог дэмжихэд чиглэсэн энэхүү өөрчлөлтийн үр дүнд өвлийн олимпод оролцогчдын 47 хувь нь эмэгтэйчүүд байхаар болж байна. Энэ нь “Бээжин 2022” олимптой харьцуулахад 3 хувиар нэмэгдсэн үзүүлэлт юм. Ингэснээр “Милан-Кортина 2026” нь жэндерийн тэгш байдалд хамгийн их ойртсон өвлийн олимп болж байна. Олимпын хөтөлбөрт 8 шинэ төрөл нэмэгдсэн ч нийт оролцогчдын тоо 2900-гаас хэтрэхгүй байх бодлогыг баримтлах аж. 2018 оны олимпод 2922, 2022 оны олимпод 2871 тамирчин оролцож байв. Миланы олимпын хөтөлбөрт бүл нэмсэн 8 төрлийг та бүхэнд танилцуулж байна. -Өвлийн олимпын шинэ спорт болох цанаар ууланд авирах төрөл /эрэгтэй, эмэгтэй спринт, холимог буухиа/ -Фристайлын эрэгтэй, эмэгтэй дуал могул төрөл -Чарганы эмэгтэй хос төрөл -Трамплины эмэгтэйчүүдийн ларж хилл төрөл -Скелетоны холимог багийн төрөл тус тус багтжээ