Завхан :Тус аймагт НҮБ-ын Хүүхдийн сангийн суурин төлөөлөгч ажиллаж байна. Монгол Улсын Засгийн газар, НҮБ-ын Хүүхдийн сангийн хамтран хэрэгжүүлж буй “Улс орны хөтөлбөр 2017-2022” Завхан аймагт амжилттай хэрэгжиж байна. 2018 онд НҮБ-ын Хүн амын сан, Хүүхдийн сангийн дэмжлэгтэйгээр Монгол Улсын Засгийн газар Үндэсний статистикийн хороотой хамтран “Нийгмийн үзүүлэлтийн түүвэр судалгаа”-г 180 орчим үзүүлэлтээр таван аймаг, хоёр дүүрэгт хийсэн. Үүний нэг нь Завхан аймаг юм. Энэ хөтөлбөрийн хэрэгжилт, үр дүн, сургамж, сайн туршлагыг хуваалцах. Мөн хөтөлбөрийн тогтвортой байдлыг хадгалан ажиллах талаар хэлэлцэх тайлангийн хурал болох гэж байна. Энэ арга хэмжээний хүрээнд өнөөдөр НҮБ-ын Хүүхдийн сангийн Суурин төлөөлөгч Эварист Коуасси-Комлан, Эрүүл мэндийн сайдын зөвлөх О.Батбаяр нар аймгийн Засаг дарга Д.Түвшинжаргал, Засаг даргын Тамгын газрын дарга Г.Мягмарсүрэн болон албаны бусад хүмүүстэй уулзлаа. Уулзалтын үеэр хөтөлбөрийн үр дүн, ололт амжилт, сайн туршлага, цаашид тулгамдаж буй асуудлаар ярилцаж, санал солилцсон юм. Хэдийгээр хөтөлбөр хэрэгжиж дуусч байгаа ч гэлээ цаашид Монгол Улсын хэмжээнд хүүхдийн сайн сайхны төлөө үйл ажиллагаагаа үргэлжлүүлэн хэрэгжүүлнэ. Мөн 200 гаруй сумын эмнэлгийг нарны эрчим хүчээр ханган ажиллана. Түүнчлэн хүүхдийн эрүүл мэнд, боловсрол, хүүхэд хамгаалал, хүүхдэд ээлтэй орон нутгийг бэхжүүлэх. Хүүхдэд ээлтэй нийгмийн хамгааллыг сайжруулах, хүүхдийн ядуурлыг бууруулах чиглэлээр судалгаа, үнэлгээ хийж, дэлхийн бусад орны сайн туршлагыг түгээн дэлгэрүүлэх ажил үр дүнтэй хэрэгжиж байгааг НҮБ-ын Хүүхдийн сангийн суурин төлөөлөгч уулзалтын үеэр онцолж байв. Мөн уулзалтын хүрээнд хөтөлбөрийн баг Завхан аймгийн Нэгдсэн эмнэлгийн 50 ортой Амаржих газар, Эрүүл мэндийг дэмжих төвийн үйл ажиллагаатай танилцлаа. Энэ сарын 12-ны өдөр Хүүхдийн сангийн суурин төлөөлөгч болон албаны хүмүүс Нөмрөг суманд ажиллаж улс орны хөтөлбөрийн үйл ажиллагаатай газар дээр нь очиж танилцах юм гэж аймгийн ЗДТГ-аас мэдээлэв. Ташрамд НҮБ-ын Хүүхдийн сангаас Монгол Улсын Засгийн газартай хамтран хэрэгжүүлж буй энэхүү Улс орны хөтөлбөр нь хүүхдийн эсэн мэнд амьдрахуй ба хөгжил, тэгш хамран сургалттай, эрүүл чанартай сургалтын орчныг бий болгох, тэгш хүртээмжтэй нийгмийн бодлого, хамгааллын тогтолцоог хөгжүүлэх гэсэн гурван зорилтыг хэрэгжүүлж байгаа аж.