Монгол Улсын бизнесийн төлөөлөл ирэх өдрүүдэд Австрийн Салцбург хотод айлчилж тус хотын Эдийн засгийн танхим, Аялал жуулчлал, зочид буудлын менежментийн институтийн удирдлагуудтай уулзаж, аялал жуулчлал, хог хаягдлын менежменттэй танилцан хамтын ажиллагааг өргөжүүлэхээр боллоо. Энэ талаар энэ сарын 20-нд Вена хотноо болсон Монгол-Австрийн бизнес форум дээр мэдээллээ. Бизнес форумыг Австрийн эдийн засгийн танхим (WKO), Монгол Улсаас Австри Улсад суугаа ЭСЯ, МҮХАҮТ хамтран зохион байгууллаа. Форумд МҮХАҮТ-ын дэргэдэх Бизнесийн академийн зөвлөх Д.Ерөө “Монгол Улсын эдийн засгийн өнөөгийн байдал, бизнесийн боломжууд”, Австрийн талаас Австрийн Эдийн засгийн танхимын Ази, Номхон далайн бүс хариуцсан менежер Кристина Шоссер “60 жилийн түүхт Монгол-Австрийн бизнес харилцаа” сэдвээр тус тус илтгэл тавьжээ. Австрийн аялал жуулчлал, хог хаягдлын менежменттэй танилцана. Бизнес форумд Монгол Улсаас 6 ААН-ийн 11 төлөөлөгч, Австрийн талаас 30 гаруй компанийн төлөөлөл оролцож, худалдаа, эдийн засгийн хамтын ажиллагааны талаар мэдээлэл солилцлоо. Форумын хэлэлцүүлэг Эрдэс баялаг, цахим боловсрол, эрүүл мэнд, хүнсний хангамж болон аюулгүй байдлыг сайжруулах, Аялал жуулчлалын салбарын хамтын ажиллагааг өргөжүүлэх, Байгаль орчинд ээлтэй, ухаалаг хотыг хөгжүүлэхэд хамтран ажиллах боломжийн талаар өрнөв. Австри улсын хувийн хэвшлийн төлөөлөл хог хаягдал дахин боловсруулах, цахим боловсрол, ЖДҮ-ийн цахим шилжилт, хөдөө аж ахуй, аялал жуулчлалын салбарт хамтран ажиллах төслийн саналуудаа танилцуулсан юм. Улмаар Монгол-Австрийн бизнес уулзалтыг Улаанбаатар хотноо энэ оны 9 дүгээр сард зохион байгуулахаар боллоо. Форумын дараа Монгол Улс болон Бүгд Найрамдах Австри Улсын Засгийн газар хоорондын комиссын 8 дугаар хурал болж, хоёр орны худалдаа, эдийн засгийн хамтын ажиллагааг цахим боловсрол, эрчим хүч, эрдэс баялаг, хөдөө аж ахуй, байгаль орчин, аялал жуулчлал, хог хаягдлын чиглэлээр өргөжүүлэн тэлэх хэлэлцээрт Монгол Улсыг төлөөлж комиссын дарга, УИХ-ын гишүүн, Цахим хөгжил, харилцаа холбооны сайд Н.Учрал гарын үсэг зурлаа.